Walonîye: li londi di rawète dès Chwès

Tot l'monde î è-st-acostumé èt i gn-a nolu qui vôreûve manquer l'ocâsion, qui on fuche catolique ou non.

Ça a c’minsi î gn-a causu 50 ans. Lès djins do Comité Central dès fièsses avun.nent dimindé à Mgr Charrue si on p’leuve dîre saquant mots è walon dins one mèsse qui, di c’timps-là, ni si dijeûve qu’è latin. L’èvèque aveûve rèspondu, è walon ètou, "Poqwè nin　!"

A faît, c’èst div’nu one uzance èt asteûre, c’èst tote li mèsse qui èst tchantéye è walon.

Adon, on côp qui on mousse foû di l’èglije Sint-Djan, èvè 11 eûres, lès djins vor’nut su l’place qui èst djondante　: li "Marché aux Légumes", à l’Djote, di-st-on è walon. C’èst vélà qui tos lès Chwès, autrumint dit lès Namurwès, si rachon.nut po l’apèritif.

On î bwè l’gote ou l’bîre avou sès camarâdes. Nolu ni fait di chichit’rîyes. Ritche ou paûve, conu ou qui on n' conu nin, syndicalisse ou maîsse, ça n’fait pon di diffèrince　: l’idéye, c’èst d’awè bon tortos èchone au mwins on djoû su l’anéye.

Li londmwin, li vékérîye rac’minse caûsu come si gn-aveûve rin yu. Mins au trèfonds di s’keûr, tot l’monde ratind qui lès fièsses rabisin.nes li pu rate possibe.

Carl Defoy